An Enemy of the People

Coovadia se An Enemy of the People tref as ’n skerp, aktuele literêre roman wat ’n plaaslike sowel ‘n universele aantrekkingskrag het. Dit speel af in ‘n hedendaagse Suid-Afrika wat vasgevang is in ekonomiese onrus, brandstigting, bankrotskap en politieke anargie. Die verhaal volg Mac Mackenjee, ‘n belastinggaarder wat sy weg deur ‘n samelewing navigeer en belasting in beginsel verwerp het te midde van stygende populisme.

Die titel is ‘n kopknik na Henrik Ibsen se klassieke toneelstuk, maar Coovadia herverbeel die tema, tiperend van ons tyd: ‘n individu wat stelselmatige korrupsie, kollektiewe ontkenning en die persoonlike tol van integriteit in die oë kyk terwyl alles om hom inmekaar tuimel, of met geweld omver gewerp word. Mackenjee is op die spoor van gesteelde biljoene, en laasgenoemde word ‘n lens vir groter vrae oor verantwoordelikheid, mag, geld, politiek en gesinslewens wat onder druk verkeer. Die vertelling vleg alledaagse werklikhede – verhoudings wat deur onsekerheid gekenmerk word – met die groter kolk van ‘n “veelvolkige” Suid-Afrika waar almal skarrel, skelmstreke aanwend, of bloot probeer oorleef.

Coovadia se prosa is so presies en ironies soos in sy vorige werk soos Tales of the Metric System, of High Low In-Between. Hy verstaan die kuns om die alledaagse lewe in al sy krisisse vas te vang: die absurditeite van die burokrasie, die onuitgesproke skuld wat gesprekke vergesel, en die manier waarop fisika (letterlik en metafories) weier om netjies in plek te val. Daar is ‘n filosofiese onderstroom – besinninge oor skuld en orde sonder om oordadig swaartillend te skryf. Die roman is terughoudend; dit skree nie sy aanklagte nie.

Met omtrent 250 bladsye is die roman kompak en jukstaponeer dit karaktergedrewe intimiteit met sosiale waarneming. Mackenjee word uitgebeeld as ‘n boeiende, dog gebrekkige protagonis – nie ‘n ‘klassieke’ heldhaftige fluitjieblaser nie, maar ‘n gewone amptenaar wie se volharding hom ‘n toevallige dissident maak. Die ondersteunende karakters is eg herkenbaar uit die hedendaagse Suid-Afrika: opportuniste, idealiste, of gesinne wat probeer saambly.

An Enemy of the People is ‘n waardevolle toevoeging tot Coovadia se oeuvre en een van die insiggewendste Suid-Afrikaanse romans van die afgelope paar jaar. Dit spreek direk tot enige iemand wat worstel met institusionele verval, populistiese aannames en die stille heldedom (of koppigheid) wat nodig is om die sisteem uit te daag. Hoogs aan te beveel vir lesers wat intelligente, politiesbewuste fiksie waardeer sonder om literêre meriete prys te gee.

© Nini Bennett-Moll

Titel: An Enemy of the People

Outeur: Imraan Coovadia

Uitgewer: Umuzi, 2026