Deur identifikasie met dierekarakters leer kinders in hierdie storie die waarde van vriendskap, uitreik na mekaar, die gevaar van insekdoders en dat mens nie alle vreemde vorme van lewe hoef dood te maak nie. Die boek is ook ʼn les in biologie: wanneer akkedisse skrik, gooi hulle hulle sterte af en sodoende lei hulle die aanvaller op ʼn dwaalspoor. Daar is ook lesse oor verkleurmannetjies en bye. As aanhangsel is daar addisionele interessante feite oor akkedisse.
Soos altyd is Riana Scheepers se taalgebruik kleurryk en idiomaties sodat klein maatjies sommer nuwe woorde, uitdrukkings en idiome al lesend aanleer. Ook sosiale waardes soos vriendskap, lojaliteit en respek vir die natuur vorm deel van die opvoedkundige onderbou van die boek. Die hartseer van vreemdelingehaat, soos die huisvrou wat die by en ander insekte doodspuit, word ʼn werklikheid wanneer Boeta die by sterf.
Een van die belangrikste vereistes vir ʼn kinderboek is die illustrasies. In hierdie boek is elke bladsy kleurvol geïllustreer en die dierekarakters word vriendelik en oorspronklik uitgebeeld. Min teks kom voor en die font word gereeld afgewissel wanneer belangrike teksdele beklemtoon word.
Hierdie is ʼn tipiese tien uit tien-boek en sal in die smaak val van kleuters en kinders in die vroeë primêre fase.
@Marlies Taljard
Titel: Alten Akkedis se sewe sterte
Outeur: Riana Scheepers
Uitgewer: LAPA, 2025
Reviews
There are no reviews yet.